ÍBÚASAMTÖK MIÐBORGAR REYKJAVÍKUR

Áskorun til borgarstjórnar vegna hverfisskipulags

Borgarstjórinn í Reykjavík
Dagur B Eggertsson

Stjórn Íbúasamtaka Miðborgar skorar á borgarstjóra að beita sér fyrir því að aukið samráð verði haft við íbúa miðborgarinnar í skipulagsmálum og að þeir fái að hafa meiri áhrif á framtíðaruppbyggingu hverfisins. Stjórnin vill með bréfi þessu vekja athygli á því að ekkert bólar á vinnu við nýtt hverfisskipulag miðborgarinnar en  vinna við slíkt skipulag hefur verið í gangi allt frá árinu 2013 í öðrum borgarhlutum en þar er gengið út frá samráði og samtali við íbúa. Stjórninni finnst það skjóta skökku við að miðborgin sitji eftir þar sem hvergi er meiri og hraðari uppbygging en þar, einkum til að fullnægja þörfum ferðaþjónustunnar.

Stjórn Íbúasamtakanna gerir sér grein fyrir því að uppbyggingar er þörf fyrir ferðaþjónustuna sem er blómstrandi atvinnugrein en leita þarf leiða til að dreifa henni í önnur hverfi og til þess að framkvæmdir hafi sem minnst rask í för með fyrir íbúa. Það er ekki raunin núna þar sem hvorki friðuð hús né kirkjugarðar fá grið fyrir stórvirkum vinnuvélum, byggt er allt of stórt í smágerðri byggð og íbúar verða ítrekað fyrir ónæði. Mikil brögð eru að því að byggingamagn sé stóraukið á lóðum í miðborginni, byggt er mun hærra en fyrri byggð og byrgt fyrir sólarljós og klöpp er brotin fyrir hyldjúpum kjöllurum með tilheyrandi ónæði og skemmdum á húsum í nágrenninu.

Miðborgin er margbrotið hverfi og íbúar miðborgarinnar eru vanir því að vera í sambýli við margvíslega og mismunandi starfsemi og hafa umborið margt í gegnum tíðina sem íbúar í öðrum hverfum myndu ekki láta bjóða sér. En skortur á samtali og samráði borgaryfirvalda við íbúana hefur orðið til þess að þeir sitja eftir með þá súru tilfinningu að sífellt sé verið að troða á rétti þeirra. Kynningar á framkvæmdum eru óaðgengilegar, grenndarkynningar afar takmarkaðar og lítið mark er tekið á athugasemdum íbúanna.

Stjórn Íbúasamtaka Miðborgar skorar á borgarstjórn að breyta þessu ástandi og beita sér fyrir því að tafarlaust verði efnt til samtals borgaryfirvalda við íbúa miðborgarinnar um framtíð hverfisins sem íbúahverfis og til samráðs við þá sem mark er takandi á.

Virðingarfyllst
f. h. stjórnar Íbúasamtaka Miðborgar
Benóný Ægisson formaður

Afrit. Hverfisráð Miðborgar og fjölmiðlar

Tilbaka

Gömul mynd

Gamla myndin er af Graf Zeppelin-loftfari yfir miðbænum 1930. Smellið á myndina til að stækka hana og hér má finna fleiri gamlar myndir úr miðborginni