ÍBÚASAMTÖK MIÐBORGAR REYKJAVÍKUR

Ályktun vegna hótels á Barónsstíg 28

Til umhverfis- og skipulagsráðs Reykjavíkur

Íbúasamtök Miðborgar Reykjavíkur leggjast gegn auglýstri breytingu á skilmálum deiliskipulags Njálsgötureits, reits 1.190.3. Í breytingunni felst að heimilað verði að hafa gististarfsemi í fjölbýlishúsinu Barónsstíg 28. ÍMR gera eftirfarandi athugasemdir:

A. Of mikið af íbúðarhúsnæði er nýtt fyrir ferðamannagistingu og íbúum Miðborgar hefur fækkað
B. Það er gegn stefnu borgarinnar að gefa út leyfi fyrir fleiri hótelum í miðborginni
C. Skammtímaleiga íbúða rýrir verulega gæði miðbæjarins sem íbúahverfis
D. Mikil þörf er á íbúðum eins og þeim á Barónsstíg 28 til íbúðar fyrir ungar fjölskyldur
E. Fólk þarf að geta treyst því að ákvarðanir stjórnvalds standi

Greinargerð
A. Of mikið af íbúðarhúsnæði er nú þegar nýtt fyrir ferðamannagistingu og íbúum hefur því fækkað í miðborginni. Þrátt fyrir mikla uppbygginu í Miðborg gefa opinberar tölur til kynna að íbúum hafi fækkað um 10% en við höfum grun um að fækkunin sé miklu meiri en komi ekki fram vegna þess að fólk sé áfram skráð sem íbúar en leigi íbúðir sínar út á Airbnb. Aðrar vísbendingar um fólksfækkun er fækkun barna á leik- og grunnskólastigi, en þremur deildum var lokað sl. haust vegna fækkun barna á Miðborg, sameinuðum leikskóla í hverfinu.

B. Það samræmist ekki stefnu borgarinnar um að gefa ekki leyfi fyrir fleiri hótelum í miðborginni. Borgarstjóri lýsti því nýlega yfir á fundi með íbúum hverfisins að ekki yrðu gefin út leyfi fyrir fleiri hótelum í miðborginni og endurtók þar yfirlýsingu sem hann gaf 2014 þegar hann var formaður borgarráðs. Það er enginn vafi á því að á Barónsstíg 28 stendur til að reka íbúðahótel, það dylst engum sem slær inn The House of Publishers - Reykjavik Apartments á leitarvélinni Google. Á Facebook og Tripadvisor má nálgast dóma frá gestum sem dvalið hafa á íbúðahótelinu The House of Publishers - Reykjavik Apartments að Barónstíg 28. Ef marka má þessar færslur er rekstur íbúðahótels þegar hafinn.

C. Skammtímaleiga íbúða rýrir verulega gæði íbúðahverfisins. Það er í hæsta máta sérkennilegt að á sama tíma og borgaryfirvöld halda fund í Ráðhúsinu með erlendum fyrirlesara sem heldur því fram að hlúa þurfi að íbúðahverfum og að skammtímaleiga íbúða í hverfum sé ekki ásættanleg því hún rýri hverfin séu hin sömu borgaryfirvöld að vinna að auknum möguleikum á skammtímaleigu innan hverfisins með því að breyta deiliskipulagi. Það er mikilvægt að í miðborginni búi áfram börn og fjölskyldur og að hún haldi sínum sérstaka brag sem íbúðarhverfi í bland við viðskipti, þjónustu og skemmtanalíf.

D. Fjölbýlishús eins og þetta er frábært fyrir ungar fjölskyldur sem eru reiðubúnar til að búa smátt en miðsvæðis og lifa bíllausum lífstíl. Mikil þörf er á slíku húsnæði því með hækkun húsnæðisverðs hefur ungu fólki fækkað í miðborginni og sést það á fækkun barna í skóla og í leikskólum. Húsið er á góðum stað, þarna í grenndinni stendur til að opna einn fyrsta ungbarnaleikskóla á vegum borgarinnar, á Barónsborg, Njálsborg er rétt hjá fyrir eldri börn og síðan Austurbæjarskóli þegar börnin komast á grunnskólaaldur. Allt eru þetta kostir sem skipta íbúa miklu máli en ferðamenn litlu. Nú hafa ruðningsáhrifin ferðaþjónustunnar þau áhrif að íbúar og fjölskyldur eru að flytja þaðan sem þéttleiki borgarinnar er mestur, í dreifðari úthverfi.

E. Fólk þarf að geta treyst því að ákvarðanir stjórnvalds standi sérstaklega ef það varðar búsetu þess en íbúðakaup eru stærsta fjárfestingin í lífi flestra. Saga byggingaframkvæmda á Barónsstíg 28 er umhugsunarverð en þar stóð áður friðað hús, byggt 1905. Sóst var eftir því að fá að rífa það eða flytja burt og mótmæltu Íbúasamtökin þeim fyrirætlunum árið 2013. Ekkert gerðist um tveggja ára skeið nema það að húsið varð að dópgreni eða afdrepi fyrir útigangsfólk en árið 2015 var gefið leyfi til að byggja fjölbýlishús, fjórar hæðir og kjallara með átta íbúðum og er það sú bygging sem nú er risin en friðaða húsið var fjarlægt. Sótt var um leyfi 2016 til að breyta húsinu í gististað í flokki II, með 10 gistieiningum en því var synjað. Nú rís þessi krafa enn á ný og ekki er gott að sjá hversvegna ljáð er máls á henni núna en samkvæmt myndum á Facebook er vinna í fullum gangi við að innrétta íbúðahótel í byggingunni. Nágrannar og aðrir íbúar í miðborginni gera þá kröfu til skipulagsyfirvalda í Reykjavík að þau framfylgi stefnu borgarinnar um að ekki rísi fleiri hótel í miðborginni, að umsókn um gististarfsemi í húsinu verði aftur synjað og að yfirlýstur tilgangur þessarar byggingar um að hún verði fjölbýlishús standi.

F.h. Íbúasamtaka Miðborgar
Benóný Ægisson formaður

Samrit sent fjölmiðlum

Tilbaka

Gömul mynd

Gamla myndin er af Graf Zeppelin-loftfari yfir miðbænum 1930. Smellið á myndina til að stækka hana og hér má finna fleiri gamlar myndir úr miðborginni