|
Ábending um biðskýli á safnstæðum
Heill og sæll borgarstjóri
Á fundi stjórnar Íbúasamtaka Miðborgar Reykjavíkur þann 16. september s.l var rætt um þær takmarkanir sem gerðar hafa verið á umferð fólksflutningabíla í miðborginni. Almenn ánægja er með þetta nýja fyrirkomulag en íbúar við ýmsar götur s.s. Hverfisgötu og Njarðargötu finna þó fyrir auknu álagi. Þeir kvarta einnig yfir því að rútufyrirtækin virði ekki tilmæli um eina aksturstefnu.
Nú er vetur að ganga í garð og á fundinum komu fram áhyggjur um að ekki sé nógu vel búið að ferðamönnunum á safnstæðunum þegar veður fara að gerast válynd. Þar eru engin biðskýli þar sem þeir geta leitað skjóls og er það mjög bagalegt. Stjórn ÍMR skorar a borgarstjóra að beita sér fyrir því að koma upp biðskýlum við safnstæðin því slík afdrep eru forsenda þess að þessi tilraun geti heppnast. Að fenginni reynslu af takmörkunum á umferð fólksflutningabíla er enginn vilji hjá íbúum miðborgarinnar til að hverfa aftur til þess ástands sem var áður en þær tóku gildi.
Kær kveðja
Benóný Ægisson
Formaður ÍMR
Samrit sent borgarfulltrúum, Samtökum aðila í ferðaþjónustu og fjölmiðlum
Tilbaka
|
Gamla myndin er af Graf Zeppelin-loftfari yfir miðbænum 1930. Smellið á myndina til að stækka hana og hér má finna fleiri gamlar myndir úr miðborginni
|
